Þetta kemur fram í Morgunblaðinu í dag. Haft er eftir Sigríði Gunnarsdóttur, framkvæmdastjóra hjúkrunar, að mikill skortur sé á hjúkrunarfræðingum og hafi lengi verið og ekki sé útlit fyrir annað en að svo verði áfram.
Spítalinn þarf um 200 hjúkrunarfræðinga til viðbótar þeim sem nú þegar starfa á sjúkrahúsinu. Þessi skortur veldur því að ekki er hægt að fjölga sjúkrarýmum í miðjum heimsfaraldri.
„Við höfum bent á vöntun á hjúkrunarfræðingum í áratugi. Við náum ekki að mennta nógu marga hjúkrunarfræðinga til að starfa í íslenska heilbrigðiskerfinu né að halda hjúkrunarfræðingum í starfi í heilbrigðiskerfinu. Nú hættir 4.-5. hver hjúkrunarfræðingur störfum í hjúkrun innan fimm ára frá útskrift. Einnig fáum við ekki aftur til starfa þá sem hafa hætt,“ er haft eftir Guðbjörgu Pálsdóttur, formanni Félags íslenskra hjúkrunarfræðinga.
Haft er eftir Sigríði að verkefnunum sé alltaf að fjölga og sjúklingarnir verði þyngri í hjúkrun og það kalli á fleiri hjúkrunarfræðinga. Hjúkrunarfræðingar eru stærsti einstaki starfsmannahópurinn hjá Landspítalanum en á síðasta ári voru 1.340 stöðugildi hjúkrunarfræðinga og ljósmæðra á sjúkrahúsinu og voru um 1.600 manns í þeim stöðum.
