Ungur stuðningsmaður PSG hugsaði sér gott til glóðarinnar í gær á leik Paris Saint-Germain og RB Leipzig í Meistaradeild Evrópu. Stuðningsmaðurinn vildi ólmur fá treyjuna hjá einum besta knattspyrnumanni sögunnar, Lionel Messi, leikmanni Paris Saint-Germain og hafði útbúið skilti fyrir leikinn.
Á skiltinu stóð: ,,Leo, gefðu mér treyjuna þína, ég gef þér mömmu mína.“
Það fylgir þó ekki sögunni hvort strákurinn ungi hafi fengið treyjuna hjá Messi sem skoraði tvö mörk í 3-2 sigri Parísarliðsins.
Kylian Mbappe kom Paris Saint-Germain yfir 9. mínútu gegn RB Leipzig. Andre Silva jafnaði metin fyrir gestina um 20 mínútum síðar. Staðan í hálfleik var jöfn.
Nordi Mukiele kom Leipzig yfir á 57. mínútu. Þá var hins vegar komið að Lionel Messi. Hann jafnaði leikinn á 67. mínútu og kom PSG yfir sjö mínútum síðar með marki úr vítaspyrnu.
Mbappe klúðraði vítaspyrnu í blálokin. Lokatölur urðu 3-2.
