Enska karlalandsliðið mun þurfa að spila næsta heimaleik sinn á Wembley á bak við luktar dyr, engir áhorfendur verða leyfðir á vellinum. Þetta eru meðal annars afleiðingar þess að stuðningsmenn enska landsliðsins náðu að þröngva sér leið inn á Wembley án þess að vera með miða á úrslitaleik Evrópumótsins sem fór fram þann 11. júlí síðastliðinn.
Nítján lögreglumenn særðust í barningnum. Lagðar voru inn fjölmargar kærur til Evrópska knattspyrnusambandsins og flestar þeirra snerust um atvik sem áttu sér stað inn á Wembley en einnig áttu sér stað átök fyrir utan völlinn sjálfan.
Auk þess að þurfa að spila næsta heimaleik sinn á bak við luktar dyr, var enska knattspyrnusambandið sektað um 100.000 pund fyrir að hafa meðal annars mistekist að koma í veg fyrir að áhorfandi næði að hlaupa inn á völlinn. Það jafngildir tæpum 15 milljónum íslenskra króna.
As expected #eng Stadium ban from Uefa … pic.twitter.com/UtMPue7e4R
— Henry Winter (@henrywinter) October 18, 2021