Bandaríska alríkislögreglan telur sig hafa fundið lík Gabby Petito sem leitað hafði verið síðustu tvo daga í Wyoming. Niðurstaða DNA-rannsóknar liggur ekki fyrir en lögreglan telur fullvíst að um lík Gabby sé að ræða. Unnusta hennar, Brian Laundrie, er nú leitað en hann er grunaður um að hafa orðið henni að bana.

Eins og kom fram í umfjöllun DV um málið í síðustu viku þá sneri Brian einn heim úr ferðalagi þeirra um Bandaríkin. Þau ætluðu að aka um Bandaríkin í húsbíl og heimsækja hina ýmsu þjóðgarða. Brian vildi ekki ræða við lögregluna eftir heimkomuna og veitti engar upplýsingar um hvar Gabby væri. Þar sem ekkert lík hafði fundist hafði lögreglan ekki ástæðu til að handtaka hann og yfirheyra og hann gat því neitað að ræða við hana um málið.

En marga grunaði að Brian vissi meira um afdrif Gabby en hann hafði látið uppi og töldu að hann hefði jafnvel myrt hana. Fjölskylda Brian sá hann síðast á þriðjudaginn í Flórída, heimaríki hans og Gabby, og er talið að hann hafi látið sig hverfa og fari nú huldu höfði og leitar lögreglan hans.

Tugir lögreglumanna leita hans nú á 24.000 hektara svæði nærri Sarasota í Flórída.