Thomas Tuchel, þjálfari Chelsea, greindi frá því á blaðamannafundi afhverju Ben Chilwell hefur ekki fengið að spila fyrir félagið á tímabilinu. Chilwell hefur ekki spilað mínútu fyrir Chelsea eða enska landsliðið frá því að hann vann Meistaradeildina með Chelsea í maí.

Chilwell var í enska landsliðshópnum sem tók þátt á Evrópumótinu í knattspyrnu í sumar en þar fékk hann ekkert að spila. Tuchel segir að þetta hafi gert hann andlega þreyttan og áhyggjufullan og hefur því ekki gefið honum tækifæri.

„Þetta hefur verið mjög erfitt fyrir hann og ég held að það sé eðlilegt. Fyrir hann var Evrópumótið erfitt þar sem hann hélt að hann myndi spila en gerði það ekki,“ sagði Tuchel á blaðamannafundi.

„Þér líður eins og hluti af liðinu en samt ekki þar sem þú færð ekki að leggja þig fram í treyjunni fyrir liðið, þetta er furðuleg tilfinning.“

„Eftir sumarfríið kom hann hingað og mér fannst hann vera andlega þreyttur. Hann var enn að hafa áhyggjur af stöðu sinni og þurfti að skilja og samþykkja. Ben var óheppin því Marcos (Alonso) fékk allt undirbúningstímabilið til að sanna sig sem hann gerði.“

„Ben verður að vera þolinmóður og halda áfram að æfa og finna gleðina aftur. Hann á alltaf möguleika á því að koma inn í byrjunarliðið.“