Sarah-Jane Sinclair er 25 ára og lýsir sér sjálfri sem tattúfíkli. Hún segist stöðugt fá leiðinlegar og neikvæðar athugasemdir á samfélagsmiðlum vegna húðflúranna, sérstaklega þeirra níu sem hún er með í andlitinu. En hún sér aðeins eftir einu tattúi. The Sun greinir frá.

Sarah-Jane er frá Essex og fékk sér fyrsta tattúið 18 ára. Hún segir að fólk stari mikið á hana úti á götu og hún verði reglulega fyrir netníði.

En hún lætur það ekki á sig fá. Hún elskar tattúin sín og sér aðeins eftir einu þeirra, nafni fyrrverandi kærasta síns. Hún fékk sér tattúið þegar þau voru búin að vera saman í aðeins tvær vikur.

Sarah-Jane segir að þáverandi kærasti hennar hefði reynt að tala hana úr því að fá sér nafnið hans á rassinn. En hún komst seinna að því að ástæðan fyrir því var að hann var að halda framhjá henni.

„Ég er ekki búin að láta setja yfir það en ég á eftir að gera það,“ segir hún.

Hana langar að vera öll þakin húðflúrum og ætlar ekki að stoppa fyrr en henni hefur tekist það. „Ég passa ekkert inn í samfélagið og við ættum ekki að vera öll eins. Ég elska að vera ég sjálf og frjáls. Ég vorkenni fólki sem lætur þetta trufla sig, frekar sorglegt og leiðinlegt,“ segir hún.

Sarah-Jane er ekki aðeins hrifin af bleki til að breyta útliti sínu heldur einnig fylliefni og ljósabekkjum. Hún er með fylliefni í vörum, nefi og höku. Hún fer einnig í ljós nær daglega en viðurkennir að núverandi kærasti hennar hefur lýst yfir áhyggjum sínum á ljósabekkjanotkun hennar.