Joe Biden, Bandaríkjaforseti, ávarpaði bandarísku þjóðina í gær vegna árásar liðsmanna hryðjuverkasamtakanna Íslamska ríkið við flugvöllinn í Kabúl í gær. 13 bandarískir hermenn létust og 15 særðust. Að minnsta kosti 90 Afganar létust. Þetta er mesta mannfall Bandaríkjahers á einum degi í Afganistan í tíu ár. Biden sagði þjóð sinni að árásanna verði hefnt.

Hann sagðist vera að íhuga að loftárásir verði gerðar á liðsmenn Íslamska ríkisins. „Til þeirra sem stóðu á bak við þessa árás og til allra þeirra sem vilja Bandaríkjunum illt: Við fyrirgefum ekki, við gleymum ekki. Við munum elta ykkur og láta ykkur gjalda fyrir þetta,“ sagði Biden.

Talið er að tveir sjálfsvígssprengjumenn hafi gert árásirnar í gær en einn af hópunum innan Íslamska ríkisins hefur lýst ábyrgð á árásunum á hendur sér. Biden sagði að hópurinn, Islamic State Khorasan, hafi skipulagt fjölda „flókinna“ árása á Bandaríkjamenn í Afganistan. „Ég hef fyrirskipað yfirmönnum hersins að gera áætlanir um árásir á Islamic State Khorasan,“ sagði Biden. „Við munum svara með miklu afli og nákvæmni þegar við teljum rétta tímann til þess á stað sem við veljum,“ sagði hann.