Það er krísa í Garðabæ en karlalið félagsins er í hættu á að falla úr efstu deild karla í knattspyrnu. Stjarnan tapaði gegn KA á Akureyri í gær og vakir falldraugurinn yfir Garðabæ.
Stjarnan hefur síðasta áratuginn átt lið í fremstu í röð í knattspyrnu karla en breyting er í ár, nú þegar fimm umferðir eru eftir hjá liðinu er Stjarnan aðeins þremur stigum frá fallsæti.
Rætt var um leikinn í Dr. Football hlaðvarpinu í gær og beindust spjótin að Eyjólfi Héðinssyni sem fékk rautt spjald gegn KA.
„Stjarnan Ultras sendu mér skilaboð eftir leik, þeir fögnuðu. Eyjólfur er í banni í næsta leik, þeir fögnuðu af því að hann hefur ekki getað neitt. Hann var í miðverði þarna, honum er enginn greiði gerður það,“ sagði Kristján Óli Sigurðsson sérfræðingur þáttarins.
Arnar Sveinn Geirsson tók í sama streng en Eyjólfur er 36 ára gamall. „Er þetta ekki komið gott, er hann ekki orðinn of þreyttur og aðeins of hægur,“ sagði Arnar.
Hjörvar Hafliðason stjórnandi þáttarins tók þá til máls og sagði þetta týpíska umræðu þegar staðan væri slæm. „Svona er þetta alltaf þegar liðum sem hefur gengið vel fer að ganga illa, þá er fundinn einn sem er helst aðkomumaður og orðinn fullorðinn. Þá er keyrt á hann, Viktor Bjarki hjá KR. Þegar það kom tapleikur þá var hann vonlaus, þetta er dæmigert til að búa til blóraböggul,“ sagði Hjörvar.
Arnar Sveinn svaraði þá Hjörvari og sagði. „Hann er ekki í þeim gæðaflokki sem hann hefur verið.“
