Í samræmi við breskar réttarreglur er nafni Gylfa Þórs Sigurðssonar haldið leyndu í fréttaflutningi þarlendra fjölmiðla af málum hans, en Gylfi er grunaður um kynferðisbrot gegn manneskju undir lögaldri. Hann var tekinn til yfirheyrslu síðasta föstudag en látinn laus að henni lokinni. Húsleit var gerð hjá honum fyrr í mánuðinum.

Meðal þeirra fjölmiðla sem fjallað hafa um málið án þess að nefna Gylfa á nafn er The Guardian. Þar eru höfð viðvörunarorð eftir saksóknaranum Michael Ellis, sem segir að almenningur verði að fara varlega í tali sínu um málið. „Allir eru saklausir uns sekt er sönnuð og allir eiga rétt á sanngjörnum réttarhöldum,“ segir Ellis við The Guardian.

Hann segir enn fremur:

„Dómgreindarlaust tíst eða færsla gæti haft alvarlegar afleiðingar og truflað réttarhöld, gæti valdið því að þau tefjast eða í versta falli stöðvast vegna þess að ekki er möguleiki á sanngjörnum réttarhöldum. Þess vegna vara ég alla við, ekki standa í vegi þess að réttlætinu verði fullnægt.“

Segir hann ennfremur að saksóknaraembættið muni fylgjast grannt með hvort einhverir gera sig seka um óvirðingu við dóminn. Slíkt felst meðal annars í því að fjalla um sakamál sem ekki hefur verið úrskurðað í á þann hátt að geti spillt réttarhöldum.

RÚV bar málið undir Guðna Bergsson, formann KSÍ, og segir hann að sambandið muni ekki tjá sig um fréttirnar af Gylfa fyrr en eftir að formleg staðfesting um að hann hafi verið handtekinn og yfirheyrður hafi borist. Engin slík staðfesting hefur borist.