Michel Faro do Prado frá Brasilíu hefur undirgengist fjölda aðgerða og ígræðslan til að líkjast meira „mennskum djöfli“ og segist ekki hræðast sársauka.
Michel er 44 ára gamall og hefur meðal annars látið fjarlægja af sér annan vísifingurinn, nefbroddinn og græða í sig fjölda horna. Nýlega lét hann græða í sig stórar skögultennur og má segja að vinir hans úr barnæsku gætu ekki þekkt hann á myndum í dag.
Hann hefur einnig þakið líkama sinn húðflúrum og meira að segja húðflúrað á sér augun. Eiginkona hans sem líka leggur stund á öfgakenndar líkamsbreytingar hefur hjálpað honum við að þróa útlitið í gegnum árin.
„Ég er búinn að vera húðflúrari í 25 ár, flest húðflúrin mín hef ég fengið frá öðrum húðflúrurum og fagmönnum sem ég hef borgað fyrir verkið. Ég er sérhæfður í öfgakenndum húðflúrum þar sem stór hluti líkamans er þakinn húðflúri. Eiginkona mín er sérhæfð í líkamsbreytingum og því var fullkomið fyrir mig að vera hennar meistaraverk þegar kemur að húðflúrum.“
Hann kippir sér ekki upp við að sumar útlitsbreytinganna sem hann hefur undirgengist hafi verið sársaukafullar.
„Ég er með háan sársaukaþröskuld og finnst ekkert vera neitt sérstaklega vont. Ég finn mun meira til eftir aðgerðir heldur en á meðan þeim stendur. Sannleikanum samkvæmt þá eru sumar aðgerðirnar þannig að það væri nánast vonlaust að þola þær án deyfingar og ég myndi alveg meta það að finna ekki til en ef ég þarf þess til að ná markmiðum mínum þá að sjálfsögðu læt ég mig hafa það.“
