Ólafur Helgi Kristjánsson, fyrrum þjálfari danska knattspyrnuliðsins Esbjerg, kom fram sem sérfræðingur í gærkvöldi í sjónvarpsþætti á Stöð 2 EM2020. Það sem vakti mikla athygli í þættinum var ekki það sem Ólafur hafði að segja, heldur bindisfrágangur hans.

Málið vakti mikla kátínu netverja og ákvað Guðmundur Benediktsson að fara yfir málið á Stöð2 Sport með Ólafi.

„Í upphitun fyrir leik Hollands og Austurríkis þá sjáum við hérna til hliðar þar sem að – þetta er Ólafur Kristjánsson -stoppaðu núna, við getum líka látið stoppa stundum. Nú verð ég bara að vita, og þú getur teiknað inn á þetta ef þú vilt, hvað gerðist hérna?“ spurði Guðmundur Benediktsson á Stöð2 Sport í gær.

Ólafur útskýrði málið á þennan hátt.  „Þarna er verið að vinna pínulítið með blátt í blátt eins og þú sérð Guðmundur. Þetta er klassískt dæmi um það þegar miðaldra karlmaður í tímaþröng milli leikja er að reyna klæða sig, ekki bara í myrkri heldur í spegilslausu herbergi. Hleypur svo inn í útsendingu og enginn segir neitt,“ sagði Ólafur.

„Við vorum að reyna finna orðið bjargráður, svo er til gangráður en þarna var vandráður. Hvort þetta verði nýtt trend, ég veit það ekki. Menn gleðjast bæði í Garðabæ og Austur á fjörðum að þetta skuli hafa tekist svona til. Ég verð bara að segja það að stundum er maður óheppinn og ég var verulega óheppinn en ég gat allavega glatt alla nokkur lítil hjörtu hérna í stúdíóinu.“