Pistill:

Efsta deild karla í knattspyrnu fór af stað um liðna helgi, engin flugeldasýning í fyrstu umferð og aðeins fjórum liðum af tólf tókst að koma boltanum í netið í þessari fyrstu umferð. Sjö mörk voru skoruð en tveir leikir enduðu með markalausu jafntefli. Ekki neitt til að hrópa húrra fyrir en þetta var ekki COVID að kenna.

Fyrir þessa fyrstu umferð beið ég eftir því að einhver af þjálfurum liðanna myndi grípa í COVID afsökun þegar rætt var um spilamennsku liðsins, hið minnsta tveir þjálfarar gripu upp COVID kortið og veifuðu því.

Leikþáttur sem allir sjá í gegnum, ekkert lið fyrir utan eitt í efstu deild hefur rétt á að nota þessa afsökun. Því eins og allir í fótboltaheiminum vita æfðu flest öll lið af krafti á meðan COVID pásan síðasta var í gangi. Menn beygðu og brutu reglurnar enda var þegjandi samkomulag um að það væri í lagi.

Takmarkanir voru á æfingum liðanna í þrjár vikur en skilaboðin frá yfirvöldum voru þau að það þyrfti ekki endilega að fara eftir þeim öllum. Fyrir því hef ég öruggar heimildir, liðin æfðu því flest á eðlilegan máta.

Það voru því vonbrigði að sjá tvo þjálfara grípa í COVID kortið í fyrstu umferð, þessi pása hafði engin áhrif á æfingar liðanna og allir leikmenn ættu að vera í sínu besta standi.

Ég vona að þjálfara liðanna hafi vit á því að nota ekki COVID kortið aftur, ég nenni ekki að hlusta á þá afsökun aftur í sumar. Hún á ekki við.