Samkvæmt niðurstöðum nýrrar könnunar Félagsvísindastofnunar Háskóla Ísland eru sextíu prósent landsmanna fylgjandi afglæpavæðingu neysluskammta fíkniefna. Þetta er mikil breyting frá sambærilegum könnunum frá 2015, 2017 og 2019 en þá studdi um þriðjungur afglæpavæðingu slíkra brota.

Fréttablaðið skýrir frá þessu í dag. Haft er eftir Helga Gunnlaugssyni, prófessor í afbrotafræði, að hann telji öruggt að frumvörp Pírata og heilbrigðisráðherra um þessi mál auk umræðunnar um þau hafi haft áhrif. Könnunin var gerð á vegum Helga og Jónasar Orra Jónassonar, félagsfræðings.

„Fyrir tveimur árum vissu fáir um hvað afglæpavæðing neysluskammta væri. Nú er mikil umræða og ráðandi aðilar í samfélaginu farnir að tala fyrir henni,“ er haft eftir Helga.

Hvað varðar þau brot sem fólk hefur í gegnum tíðina talið alvarlegustu brotin hér á landi hafa fíkniefnabrot verið á toppnum en í nýju könnunin eru þau í þriðja sæti en 23% sögðu þau valda mestum vanda. Flestir, eða 30%, sögðust telja kynferðisbrot alvarlegustu og þar á eftir komu efnahagsbrot en 26% nefndu þau.

Helgi sagði að umræðan um kynferðisbrot hafi færst í aukana frá 2013. Það megi rekja til barnaníðsmála, Metoo og umræðu um stafrænt kynferðisofbeldi. Einnig hafi færst í vöxt að litið sé á fíkniefnamál sem heilbrigðismál en ekki afbrot. „Það hefur dregið úr óttanum gagnvart fíkniefnum og fólk er tilbúið að leita nýrra leiða til að takast á við þau,“ sagði hann.