Fjölmiðlar vestanhafs greina nú frá því að raunveruleikastjarnan Kim Kardashian sé komin með nýjan kærasta. Það eru komnir tveir mánuðir síðan hún sótti um skilnað frá Kanye West. Saman eiga þau fjögur börn.
Sögur herma að Kim, 40 ára, sé að slá sér upp með fjölmiðlamanninum Van Jones, 52 ára. Van Jones er kynnir á sjónvarpstöðinni CNN.
Sögusagnir um samband þeirra hafa verið á sveimi í smá tíma. En eftir að Cindy Adams, dálkahöfundur Page Six, fjallaði um meint samband þeirra fóru sögusagnirnar á enn meira flug.
Þetta er þó aðeins orðrómur og telja margir Van Jones vera mjög ólíklegan kost fyrir Kim. Samkvæmt slúðurmiðlum eru meðlimir konungsfjölskyldunnar, stórleikarar og milljarðarmæringar á höttunum eftir stefnumóti með Kim.
Kim hefur þekkt Van Jones í þó nokkur ár. Þau börðust saman fyrir umbótum á bandarísku réttarkerfi árið 2018.
Van Jones er fréttaskýrandi fyrir CNN og lögfræðingur að mennt. Hann er þekktur fyrir að vera vinstra megin í pólítík og starfaði fyrir Barack Obama í forsetatíð hans. Hann hefur einnig skrifað bók sem komst á metsölulista New York Times og fengið Emmy-verðlaun.
