Þrír íslenskir þingmenn eru skráðir á Evrópumót þingmanna í skák sem hefst föstudaginn 16. apríl næstkomandi. Teflt verður á internetinu en alls eru 28 þingmenn skráðir til þátttöku. Þetta er í fyrsta sinn sem mótið er haldið.

Þingmennirnir sem koma til með að taka þátt eru þeir Karl Gauti Hjaltason úr Miðflokknum, Páll Magnússon og Brynjar Níelsson, báðir úr Sjálfstæðisflokknum. Samkvæmt Facebook-færslu Evrópska skáksambandsins er Karl Gauti eini með skráð FIDE-stig en þau eru 1546 talsins.

DV hafði samband við Brynjar og ræddi við hann um komandi mót en hann er heima hjá sér þessa dagana í sóttkví eftir komu til landsins frá Spáni.

„Ég fékk þessi boð á meðan ég var í þessari frægu utanlandsför. Mögulega fer ég að hitta þá þegar ég fer úr sóttkvínni og við tökum einhverja æfingu. Gunnar Björnsson, forseti Skáksambandsins, tróð mér í þetta núna, sennilega af því að hann vissi hvað ég var góður,“ segir Brynjar kokhraustur en hann telur sjálfan sig vera yfirburða skákmann.

„Ég held að ég sé miklu betri en þeir,“ segir Brynjar og hlær. Helgi, sonur Brynjars, var eitt sinn Íslandsmeistari barna í skák og tefldi Brynjar mikið með honum á þeim tíma.

Það er því ljóst að skákhæfileikar hans hafi erfst áfram til næstu kynslóðar en spurning hvort Brynjar nái að standa í hárinu á bestu mönnum mótsins og rifji upp gamla takta. Tveir stórmeistarar taka þátt í mótinu en þeir eru frá Hollandi og Moldóvu.

https://www.facebook.com/europeanchessunion/posts/3917179938342195