Lilja Alfreðdóttir, Mennta- og menningarmálaráðherra, þingmaður Reykvíkinga og varaformaður Framsóknarflokksins leggur mikla áherslu á það að íþróttir fari aftur af stað innan tíðar.

Núverandi takmarkanir koma í veg fyrir það að íþróttir séu stundaðar á eðlilegan hátt. Íþróttamál heyra undir Lilju og hefur hún átt samtal um afléttinu, núverandi takmarkanir gilda til 15 apríl.

„Það er forgangsmál hjá stjórnvöldum að koma íþrótta- og æskulýðstarfi af stað enda er um mikilvægt lýðheilsumál að ræða. Það er brýn þörf á að virkja iðkendur og tryggja samfellu í æfingum íþróttafólks. Nú er markmiðið að íþróttastarf geti hafist samhliða sóttvarnarráðstöfunum,“ skrifar Lilja á Facebook.

„Fram hefur komið að mikil þörf er á að fyrirsjáanleiki aukist um hvernig skipulagi verði háttað. Mikilvægt er að samræmi sé í takmörkunum í skólastarfi og íþrótta- og æskulýðsstarfi ásamt því að tryggja að skipulag íþróttastarfs sé sambærilegt í alþjóðlegu samhengi, eins og frekast er unnt. “

Lilja segist hafa átt samtal við Þórólf Guðnason og Svandísi Svavarsdóttur um málið. „Við í mennta- og menningarmálaráðuneytinu höfum í samstarfi við heilbrigðisráðuneytið og sóttvarnalækni unnið að því að undirbúa að umrædd starfsemi geti hafist við fyrsta tækifæri.“