Vegna fjölgunar kórónuveirusmita í Osló hefur verið ákveðið að herða sóttvarnaaðgerðir í borginni. Á miðnætti tóku hertar reglur gildi og gilda fram til 15. mars. Allar verslanir verða lokaðar nema matvöruverslanir og lyfjaverslanir. Veitingastöðum og kaffihúsum verður einnig gert að loka nema hvað það má selja veitingar sem fólk sækir eða fær sendar heim.

Tilkynnt var um þetta á sunnudagskvöldið. Á morgun verður tekin ákvörðun um hvort gripið verður til samskonar aðgerða í Lørenskog sem er í útjaðri Osló. Það sama á við um Lillestrøm, ákvörðun verður tekin á morgun.

Norðmönnum hefur gengið ágætlega að halda aftur af útbreiðslu veirunnar en þeir hafa mikið notast við svæðisbundnar sóttvarnaaðgerðir eftir því sem þörf hefur þótt á hverju sinni.