Rannsókn á morðinu á Armando Beqirai, sem var skotinn til bana í Rauðagerði um síðustu helgi, miðar ágætlega að sögn lögreglunnar. Málið er sagt vera eitt flóknasta og umfangsmesta sakamál, sem upp hefur komið hér á landi, á síðustu árum. Sjö hafa verið úrskurðaðir í gæsluvarðhald vegna rannsóknar málsins.

Í umfjöllun Morgunblaðsins um málið í dag segir að tveir, að minnsta kosti, hafi kært gæsluvarðhaldsúrskurðinn til Landsréttar. Haft er eftir Margeiri Sveinssyni, yfirlögregluþjóni, að lögreglan telji sig vera með skotmanninn í haldi en útilokar ekki að fleiri en einn hafi verið að verki.

Aðeins einn Íslendingur er á meðal hinna handteknu. Hinir eru erlendir ríkisborgarar en flestir búsettir hér á landi. Íslendingurinn heitir samkvæmt heimildum DV Anton Kristinn Þórarinsson en hann hefur að sögn verið umsvifamikill í fíkniefnaheiminum árum saman. Hann hefur lýst sig saklausan af aðild að málinu og kærði gæsluvarðhaldsúrskurðinn til Landsréttar.

Morgunblaðið segir að Evrópulögreglan Europol aðstoði við upplýsingaöflun vegna málsins en einn angi rannsóknarinnar snýr að því hvort málið hafi tengingu við skipulögð erlend glæpasamtök.

Lögreglan hefur lagt hald á marga muni vegna rannsóknarinnar og framkvæmt fjölda húsleita.

Morgunblaðið segist hafa heimildir fyrir að þeir fjórir sem voru úrskurðaðir í gæsluvarðhald á sunnudaginn og á þriðjudaginn tengist. Eru útlendingarnir sagðir hafa starfað fyrir Anton Kristinn sem er sagður vera í mjög erfiðri stöðu í undirheimunum þessa dagana eftir að hann var sakaður um að hafa verið uppljóstrari lögreglunnar árum saman. Eru útlendingarnir sagðir hafa verið fengnir hingað til lands til að vernda Anton, meðal annars.