Danskir vinir Freyju Egilsdóttur, sem var myrt á heimili sínu í Malling á Jótlandi fyrr í mánuðinum, hrundu fyrir helgi af stað fjársöfnun fyrir börn hennar en Freyja lætur eftir sig tvö ung börn. Söfnunin hefur gengið framar öllum vonum að sögn Kim Sebine Krolmark, sem er ein af þremur upphafsmönnum söfnunarinnar. Í gærkvöldi höfðu 108.000 danskar krónur safnast en það svarar til um 2,2 milljóna íslenskra króna.

„Við komumst í 108.000 krónur nú í kvöld. Það er frábært að fólk vilji hjálpa börnunum,“ sagði hún í samtali við B.T.

Freyja var myrt af fyrrum eiginmanni sínum, Flemming Mogensen, á heimili sínu í Malling. Flemming hefur viðurkennt að hafa orðið Freyju að bana. Þetta var ekki í fyrsta sinn sem hann varð konu að bana því 1995 myrti hann tvítuga barnsmóður sína með því að stinga hana 18 sinnum. Fyrir það var hann dæmdur í tíu ára fangelsi.