Fimmtudaginn 11. febrúar voru liðin 30 ár frá því Íslendingar viðurkenndu sjálfstæði Litáen, fyrstir þjóða. Litáen lýsti yfir sjálfstæði í mars 1990. Þann 11. febrúar 1991 var síðan samþykkt á Alþingi að viðurkenna sjálfstæði Litáa. Sú ákvörðun hefur þótt lýsa miklu hugrekki því Litáen var þá hluti af Sovétríkjunum sem voru vön að bregðast af hörku við sjálfstæðistilburðum Eystrasaltsríkjanna. Svo varð þó ekki því Sovétríkin liðuðust sundur skömmu eftir þetta.
Jón Baldvin Hannibalsson var á þessum tíma utanríkisráðherra Íslands og hafði allt frumkvæði að þessari ákvörðun fyrir hönd Íslendinga.
Í frétt RÚV þar sem sagt er frá þessum tímamótum er Jón Baldvin ekki nefndur á nafn en sést þó greinilega í myndskeiði frá 1991 sem birtist með fréttinni.
Inga Minelgaité, kjörræðismaður Litáens á Íslandi, færði Guðlaugi Þór Þórðarsyni utanríkisráðherra blóm og þakkir frá litáensku þjóðinni í tilefni 30 ára afmælis sjálfstæðisviðurkenningar Íslendinga.
Í frétt RÚV heyrist Inga ekki minnast á Jón Baldvin. Í umræðum á Facebook í kvöld má skilja á henni að hún hafi rætt um Jón Baldvin í fréttinni. Alþekkt er að fréttaviðtöl í sjónvarpi eru iðulega klippt og stytt.
Glúmur Baldvinsson, sonur Jóns Baldvins, fer hörðum orðum um RÚV á Facebook í kvöld og í ummælum þar er Inga spurð hvort hún hafi minnst á Jón Baldvin við RÚV. Svarar hún því til að hún geri það alltaf.
Glúmur skrifar: „Ég er kjaftstopp. Horfði á frétt RUV sem fjallaði um þakklæti Litháensku þjóðarinnar til okkar Íslendinga fyrir að hafa fyrst þjóða viðurkennt sjálfstæði Litháa fyrir akkurat 30 árum. Í fréttinni segir að sérhvert mannsbarn í Litháen sé ævarandi þakklátt Íslendingum enn þann dag í dag. En hvað er ekki minnst á í fréttinni og við hvern er ekki talað? Jú manninn sem fyrir okkar hönd viðurkenndi sjálfstæði Litháa. Ekki orð um þann mann! Hvílíkur dónaskapur og hneisa. RUV skammastu þín.“
Ásakanir á hendur Jóni Baldvin um kynferðislega áreitni hafa verið mjög fyrirferðarmiklar í fjölmiðlum undanfarin ár. Hefur umfjöllun þau mál líklega náð hámarki undanfarna daga vegna meiðyrðamáls Jóns Baldvins á hendur RÚV, Sigmari Guðmundssyni og Aldísi Schram, dóttur Jóns Baldvins, en hann stefnir vegna viðtals sem Sigmar tók við Aldísi og spilað var á Rás 2. Aldís sakar föður sinn um kynferðisbrot og að hafa fyrirskipað nauðungarvistun hennar árið 1992, en þá var hann ráðherra.
https://www.facebook.com/GlumurB/posts/10160563644207835
