Þau Frosti Logason og Helga Gabríela Sigurðardóttir gengu í það heilaga um helgina í brúðkaupi sem leit virkilega fallega út á þeim myndum sem birtar voru á samfélagsmiðlum úr brúðkaupinu.
Frosta þekkja flestir sem útvarpsstjörnuna sem hann er á X-inu en Helga er þekkt fyrir að vera einn færasti vegan kokkur landsins. Þá er hún yfirkokkur á Klömbrum Bistro en auk þess var hún að stofna kökufyrirtæki með móður sinni. Móðir Gabríelu er vinsæll förðunarfræðingur, hún starfaði til að mynda sem förðunarstjóri RÚV og stofnaði og rak Make Up Store og má því fastlega gera ráð fyrir því að hún hafi séð um förðunina í brúðkaupinu.
Á samfélagsmiðlum mátti síðan sjá svipmyndir úr brúðkaupinu. Til dæmis mátti sjá veitingarnar, sem voru áberandi flottar, og far brúðhjónanna í Háteigskirkju en þau voru keyrð á hvítum Range Rover af vini sínum. Söngkonan Ragnheiður Gröndal söng í athöfninni og veislan var síðan haldin á vinnustofu Kjarval í miðborginni.
Þá mátti líka sjá að brúðkaupið var svo sannarlega stjörnum prýtt, brot af besta tónlistarfólki landsins mætti og skemmti brúðhjónunum og gestum þeirra. Friðrik Dór, Högni Egilsson, Gréta Salóme, Bríet og sjálfur Bubbi Morthens mættu öll og sýndu listir sínar á þessum fallega degi.
Þrátt fyrir að Frosti og Helga hafi gengið í það heilaga í gær voru það ekki einu fréttirnar í brúðkaupinu. Nýgiftu hjónin opinberuðu nefnilega að það væri að fjölga í fjölskyldunni þeirra en Helga er ólétt af öðru barni þeirra hjóna. Þau eiga von á öðrum dreng og er hamingjan allsráðandi.
DV óskar hjónunum innilega til hamingju, bæði með brúðkaupið og barnið sem er á leiðinni.
View this post on Instagram
