Ólafur Guðmundsson, varaborgarfulltrúi Sjálfstæðisflokksins, hefur vakið mikla athygli á samfélagsmiðlinum Twitter fyrir ummæli sín við frétt sem birtist á Vísi í gær. Fréttin sem um ræðir fjallar um það að Degi B. Eggertssyni, borgarstjóra Reykjavíkur, sé brugðið vegna skotárásinnar en lögreglan fann byssukúlur í bílhurð Dags.

„Byrjaðu á sjálfum þér… Hér er afleiðing af því sem hampað hefur verið frá svokallaða hruninu 2008. Nú er byltingin komin heim og þú verður bara að taka því Hr. borgarstjóri,“ skrifaði Ólafur við frétt Vísis en Ólafur hefur nú eytt færslunni með ummælunum.

Þessi ummæli voru þó endurbirt á Twitter í morgun en á meðal þeirra sem vöktu athygli á þeim var Heiða Björg Hilmisdóttir, borgarfulltrúi og varaformaður Samfylkingarinnar.

„Hvað er það sem varaborgarfulltrúi Sjálfstæðisflokks er að reyna að kalla fram hér?“ spurði Heiða í tístinu sem hún birti um málið. Tístið hefur vakið mikil viðbrögð. „Þetta er alvarlegt,“ segir leikarinn Felix Bergsson til að mynda í athugasemdunum við það.

Aðrir borgarfulltrúar fordæma orð Ólafs

Hildur Björnsdóttir, borgarfulltrúi Sjálfstæðisflokksins, var ekki lengi að fordæma þessi orð Ólafs en hún gerði það á Twitter. „Hafi það verið einhverjum vafa undirorpið, þá fordæmi ég þessi dapurlegu ummæli Ólafs. Það hlýtur að vera algjört grundvallaratriði í lýðræðissamfélagi að fólk geti tekið þátt í pólitískri umræðu án þess að öryggi þess sé ógnað eða friðhelgi heimilis og fjölskyldu rofin,“ skrifaði Hildur um málið.

Magnús Guðmundsson, eða Maggi Peran eins og hann kallar sig, vakti einnig athygli á orðum Ólafs. Maggi sagðist treysta á að þeir sjálfstæðismenn sem hann ber mikla virðingu fyrir taki Ólaf á eintal og merkti Áslaugu Örnu Sigbjörnsdóttur dómsmálaráðherra, Guðlaug Þór utanríkisráðherra og Katrínu Atladóttur borgarfulltrúa við færsluna. „Þetta er vægast sagt ógeðslegt komment,“ sagði Maggi svo.

Katrín var fljót að mæta í þráðinn og fordæmdi ummælin líkt og Hildur gerði. „Sorgleg ummæli hjá honum. Enginn á að þola hótanir og árásir sem þessar í opnu og frjálsu samfélagi. Við eigum öll sem eitt að fordæma þær,“ sagði Katrín.