Kristján Markús Sívarsson hefur opnað vefsíðuna pawnshop.is og með því að hans sögn, fyrstu veðlánastarfsemi landsins. Vísir birti í dag viðtal við Kristján þar sem hann segir starfsemina vera löglega en bætir við að tæknilega ætti þetta að vera ólöglegt.

Fólk getur fengið lánaðan pening hjá versluninni gegn því að skila inn vöru sem veði og borgar svo lánið til baka seinna og fær vöruna aftur. Einnig er hægt að selja pawnshop.is hluti. Starfsemi af þessu tagi er vinsæl um allan heim, þá sérstaklega Bandaríkjunum, en margir raunveruleikaþættir á borð við Pawn Stars-þættina á History Channel hafa slegið í gegn meðal áhorfenda. Starfsemin hljómar mjög eins og smálánastarfsemi en hún er ólögleg á Íslandi. Líklegast er þetta löglegt vegna vöruskiptanna sem eiga sér stað, þótt málið séu á gráu svæði lagalega séð.

Kristján, sem hefur hlotið nokkra dóma í gegnum ævina, þar á meðal fyrir frelsissviptingu og fyrir að aðstoða ekki barnsmóður sína þegar hún var í lífshættu, segir alla eiga skilið annað tækifæri, hann hafi vissulega gerst sekur um mörg afbrot en á þeim tíma hafi hann verið í neyslu, hann sé hættur öllu slíku núna og hafi verið án fíkniefna í nokkurn tíma.

Vefsíðan pawnshop.is er komin í loftið og mun starfsemin fara fram á henni þangað til Kristján fær húsnæði fyrir verslun. Á síðunni má meðal annars finna símtæki, Airpods og gítar. Þjófar gætu reynt að selja stolna hluti til Kristjáns og til að komast hjá því skráir hann nafn og kennitölu og fær undirskrift frá fólki. Þannig verður hægt að rekja vöruna til þjófsins ef um þýfi er að ræða.