Karlmaður fæddist með sjaldgæfan sjúkdóm sem veldur því að hann er með stór og mikil æxli í andlitinu, svo mikil að hann virðist ekki vera með andlit.

Latif Khatana, frá Jammu í Indlandi, fæddist með neurofibromatosis 2 (NF2). Það er meðfæddur sjúkdómur sem ágerist með aldrinum. Latif kemur fram í nýju myndbandi frá netmiðlinum Truly.

Latif er með æxli víðs vegar um líkamann, en stærstu æxlin eru í andliti hans. Stærð æxlanna hefur valdið því að Latif hefur misst sjónina í öðru auganu og á erfitt með að sjá með hinu.

Uppvaxtarárin reyndust Latif ekki auðveld og þarf hann enn í dag að þola ljótar athugasemdir og augngotur frá ókunnugum. Latif segir frá því að eitt sinn hafi hermenn beint byssum að honum þar sem þeir töldu hann vera skepnu. Latif þurfti að grátbiðja mennina um að skjóta ekki og sagðist vera mennskur.

Í dag er Latif hamingjusamlega giftur faðir. Eiginkona hans, Salima, fæddist án hægri fótar og tengdust þau vegna fötlunar sinnar.

NF2 orsakast af stökkbreytingu í geni, Sjúkdómurinn erfist ríkjandi sem þýðir að það er nóg að fá stökkbreytinguna frá öðru foreldrinu til að fá sjúkdóminn. Latif á tvær dætur og er feginn að hingað til hafa hvorugar dæturnar sýnt merki um að vera með sjúkdóminn, hann vonar að það haldi þannig áfram.

Latif segir að það sem hann óskar sér fyrir dætur sínar er að þær séu heilbrigðar og fái menntun.

Horfðu á þáttinn hér að neðan.