Það er óhætt að segja að Frakkinn Romain Vandendorpe sé ískaldur en hann á nú heimsmetið í að sitja í ís, sem nær upp að höfði, lengst allra. Honum tókst að sitja í glerbúri fullu af ísklumpum, sem þöktu allan líkamann upp að höfði, í tvær klukkustundir, 35 mínútur og 43 sekúndur.

Vandendorpe, sem er 34 ára heilbrigðisstarfsmaður, segist hafa undirbúið sig undir þetta með æfingum í frysti, í nuddpotti fullum af ísköldu vatni og í Frönsku Ölpunum. Hann segist gera þetta til „fara lengra en menn eiga að geta“.

Hann notast við tækni sem kemur honum í nokkurskonar dagdraumaástand þegar hann er í kuldanum og þannig getur hann þolað svona lengi við.

Um fimmtíu manns voru viðstaddir þegar hann setti heimsmetið í heimabæ sínum Wattrelos í norðurhluta Frakklands.

Sjálfur hefur hann einfalda skýringu á því hvernig hann náði þessum árangri: „Ef við æfum og gefum allt sem í okkur býr í æfingarnar getum við þróast og náð árangri sem bætir hlutina,“ sagði hann.

Fyrra heimsmetið var 1 klukkustund og 53 mínútur.