Vísindamenn notuðu öflugan nýjan sjónauka, sem er staðsettur í óbyggðum Ástralíu, til að kortleggja þrjár milljónir vetrarbrauta á aðeins 300 klukkustundum. Með þessu hafa þeir afhjúpað sum af dýpstu leyndarmálum alheimsins.

Sjónaukinn var þróaður af áströlskum vísindamönnum en hann nefnist The Australian Square Kilometre Array Pathfinder (ASKAP). Með honum settu þeir met við rannsókn á 83% hins sýnilega suðurhluta geimsins og kortlögðu um þrjár milljónir vetrarbrauta á 300 klukkustundum. The Guardian skýrir frá þessu.  Með þessu hefur heldur betur bæst við kort yfir alheiminn að sögn Australian science agency (CSIRO) sem rekur sjónaukann.

Fjarlægustu vetrarbrautirnar, sem við þekkjum til, voru kortlagðar en um ein milljón vetrarbrautanna hafði aldrei áður sést. Larry Marshall, forstjóri CSIRO, segir að með verkefninu hafi sum af dýpstu leyndarmálum alheimsins verið afhjúpuð. „ASKAP notar allra nýjustu tækni til að svara gömlum spurningum um leyndardóma alheimsins og veitir vísindamönnum um allan heim nýjar upplýsingar til að leysa þær áskoranir sem þeir standa frammi fyrir,“ sagði Marshall í yfirlýsingu.