Erik Hamren mun hætta sem þjálfari Íslands eftir leikina gegn Dönum og Englandi. Þetta staðfesti hann á fréttamannafundi í dag.

„Tveir leikir eftir á þessu ári, tveir mikilvægir leikir gegn Dönum og Englandi. Ég mun hætta sem þjálfari Íslands, ég fékk spurningar um þetta eftir Ungverjaland. Ég ræddi við Guðna og leikmennina, ég vildi láta þá vita að ég hætti,“ sagði Hamren og kom mörgum á óvart með þessari tilkynningu.

Eftir að Ísland komst ekki inn á EM ákvað hann að láta af störfum en það var hans ákvörðun.

„Þegar ég fékk tilboðið um að taka við starfinu, ég taldi mig geta komið liðinu á EM. Ég hafði farið þangað með Svíum og vildi fara með Ísland, ég trúði því. Það var markmið mitt. Við vorum nálægt þessu, mjög nálægt. Við hefðum farið inn á EM með gömlu reglunum í riðlakeppninni sem besta þriðja sætið. Við vorum komnir á EM þegar fimm mínútur voru eftir af leiknum gegn Ungverjalandi.“

„Ég vil þakka mörgum og kveðja, sérstaklega leikmennina.“

„Þetta var mín ákvörðun, markmiðið var að fara á EM og láta svo annan taka yfir. Núna förum við ekki á EM, undankeppni HM byrjar í mars og það er betra í mínum huga að annar taki við.“

Hamren tók við landsliðinu eftir HM 2018 og ætlaði sér að koma liðinu á EM, eftir að það mistókst ákvað hann að láta af störfum.