Páll Kristjánsson formaður KR fagnar þeirri ákvörðun KSÍ að gefast ekki upp og reyna allt sem hægt er til að klára Íslandsmótin í knattspyrnu. KSÍ staðfesti þá ákvörðun sína í gær að reynt yrði að hefja leik aftur í byrjun nóvember ef reglugerð yfirvalda leyfir. Allt hefur verið stopp í rúmar tvær vikur vegna kórónuveirunnar.

„Að mótum meistaraflokka verði haldið áfram í öllum deildum að því tilskyldu að takmarkanir á æfingum og keppni verði afnumdar eigi síðar en 3. nóvember,“ sagði í yfirlýsingu KSÍ.

Talsverður fjöldi félaga vildi hreinlega blása mótið af á þessum tímapunkti, flest höfðu talsvert mikla hagsmuni af því að hætta leik. KR-ingar hafa aftur á móti mikla hagsmuni af því að mótið verði klárað en liðið er í harðri baráttu um Evrópusæti en hefði mótinu verið hætt hefði KR misst af því.

„Í fyrsta lagi þá trúðum við því aldrei að mót­inu yrði slaufað og í öðru lagi, án þess að vera með of mikl­ar yf­ir­lýs­ing­ar, hefðum við aldrei setið þegj­andi og hljóðalaust und­ir því ef mót­inu yrði slaufað. Það voru og hafa aldrei verið nein­ar for­send­ur fyr­ir því og við telj­um afar brýnt að úr­slit­in ráðist inni á vell­in­um,“ sagði Páll við Morgunblaðið og má túlka að KR hefði skoðað það að fara í mál við Knattspyrnusambandið.

Flestar deildir í Evrópu hafa reynt að klára öll sín mót en í Frakklandi og Hollandi var allt blásið af í vor, það hefur skapað mikil leiðindi og málaferli í þeim löndum.

„Ef við horf­um í kring­um okk­ur og sjá­um hver staðan er hjá þjóðum sem ákváðu að hætta keppni síðasta vor held ég að flest knatt­spyrnu­sam­bönd sjái eft­ir þeirri ákvörðun. Þar eru málaferli og al­menn leiðindi í gangi, eitt­hvað sem við eig­um ekki að þurfa að fara í hér á Íslandi,“ sagði Páll við Morgunblaðið.