Harry Maguire, fyrirliði Manchester United, skoraði fyrsta mark liðsins í 1-4 sigri á Newcastle United í ensku úrvalsdeildinni í gær. Maguire hlaut 8 í einkunn fyrir frammistöðu sína í einkunnargjöf SkySports og var valinn maður leiksins.
Leikmaðurinn hefur legið undir mikilli gagnrýni undanfarna mánuði. Hann lenti í vandræðum í Grikklandi í sumar og hefur átt erfitt með að fóta sig á knattspyrnuvellinum. Í síðustu viku fékk hann að líta rauða spjaldið í leik Englands og Danmerkur.
Harry Maguire sló á gagnrýnisraddirnar í gær með flottri frammistöðu. Meðal þeirra sem hrósuðu leikmanninum var Gary Lineker, þáttastjórnandi Match of the day.
Now that is how you respond to a difficult period in your career and life. You don’t give in. You stand and fight. Pleased for @HarryMaguire93 👏🏻
— Gary Lineker (@GaryLineker) October 17, 2020
Ole Gunnar Solskjær, knattspyrnustjóri Manchester United, var ánægður með frammistöðu leikmannsins.
,,Harry skoraði og sýndi gott fordæmi. Hann sýndi mikinn karakter, ég er ánægður fyrir hans hönd. Undanfarnar vikur hafa verið erfiðar fyrir hann,“ sagði Solskjær í viðtali við SkySports.
Leikmaðurinn gekk til liðs við Manchester United frá Leicester City í ágúst árið 2019 fyrir 80 milljónir punda.
