„Þetta er skelfileg staða í þessu sveitarfélagi og það á við um alla sýsluna,“ segir Baldur skólabílstjóri og íbúi í Rangárþingi Eystra en hann gagnrýnir harðlega að þar skuli ekki vera til staðar staðbundin sjúkrabílaþjónusta. Hátt í 200 manns hafa deilt Facebook-færslu Baldurs frá því á fimmtudag en þar segir hann frá því að þjónusta HSU hafi ekki verið til staðar á ögurstundu.
„Í gær um hádegið var slys í Hvolsskóla þega nemandi datt á svelli og fékk mjög slæmt höfuð högg. Hringt var á heilsugæsluna á Hvolsvelli, þar var staðan sú að læknirinn var á fundi á Hellu og hjúkrunarfræðingur ekki við og var viðkomandi bent á að hringja í 112 og fá sjúkrabíl. Engin sjúkrabíll í Rangárþingi – hann var staddur á Selfossi,“ segir Baldur og bætir við á öðrum stað:
„Er ekki rétt að fara að ráða manneskju yfir HSU sem sér út fyrir lóðamörkin á Selfossi? Þetta verður að laga.“
Ný Heilbrigðisstofnun Suðurlands (HSU) varð til þegar sameinaðar voru heilsugæslur og sjúkrahús á Suðurlandi og nú síðasta sameining við Vestmannaeyjar og Höfn. Rekur HSU tvær heilsugæslustöðvar í Rangárþingi sem staðsettar eru á Hellu og Hvolsvelli og eiga þær stöðvar að þjóna allri Rangárvallasýslu. Samkvæmt fyrirkomulagi á að taka á mótu öllum slysum og bráðatilfellum á afgreiðslutíma heilsugæslunnar en eftir kl. 16 á virkum dögum og um helgar fer öll almenn móttaka fram á heilsugæslunni og bráðamóttökunni á Selfossi.
„Venjulega er þrír læknar á staðnum en þeir eru allir á Hellu þegar þetta gerist. Ég veit ekki hversu margir hjúkrunarfræðingar eru að vinna hérna en enginn af þeim var á Hvolsvelli á þessum tíma,“ segir Baldur í samtali við DV.is.
Hann bætir við að barnið sem um ræðir hafi blessunarlega ekki slasast alvarlega en það var flutt á Selfoss og þaðan til Reykjavíkur til aðhlynningar. Hann spyr sig þó hvernig hlutirnir hefðu farið ef um hefði verið að ræða bráðatilfelli á borð við heilablæðingu.
Hann gagnrýnir að heilsugæslustöðvarnar á Suðurlandi séu reknar sem eitt stórt „batterí“ eins og hann orðar það.
„Við verðum að fá fastráðna sjúkrabílaþjónustu og það þarf að auka þjónustuna á heilsugæslustöðvunum okkar. Hvað gerist ef að það verðurstórt útkall eða ef það verður árekstur og það er enginn sjúkrabíll eða læknir á staðnum?
Hér eru 1800 manns sem búa í þessu sveitarfélagi, við erum með tvo vinnustaði sem eru með hátt í 150 manns hvor auk þess sem við erum með leikskóla þar sem dvelja yfir 100 börn. Fyrir utan það er þetta eitt stærsta landbúnaðar og ferðamannahéraðið,“ segir Baldur og bendir á að svipað ástand sé á Hellu.
„Fólk er bara orðið yfir sig þreytt á þessu.“