Það var áhugaverð umræða í útvarpsþætti Fótbolta.net í gær um þá staðreynd að mörg félög væru ekki að fara eftir reglum almannavarna um æfingar í meistaraflokki. Nánast var fullyrt að fjöldi félaga fari ekki eftir settum reglum.
Í meistaraflokki mega ekki fleiri en sjö æfa saman en þær reglur gilda til 25 maí þegar hefja má æfingar að fullum krafti.
„Maður er búinn að heyra margar sögur af því að hin og þessi lið séu ekki að hlýða Víði upp á tíu. Það virðast vera ansi mörg lið miðað við ábendingarnar, sögurnar, snappchöttin og myndirnar sem er verið að senda,“ sagði Elvar Geir Magnússon ritstjóri Fótbolta.net í þættinum.
Sagt var að ábendingar hefðu borist þess efnis að miklu fleiri væru að æfa saman og að tveggja metra reglan væri ekki virt.
„Ég hafði ekki undan í morgun að taka við sögum um að hinir og þessir væru að æfa ellefu gegn ellefu eða sjö gegn sjö, æfingar í fullum ´’kontakt’. Þarf Víðir að mæta með bolluvöndinn og rassskella menn?,“ sagði Tómas Þór Þórðarson léttur.