Það borgar sig að geyma blýantinn í pennaveskinu
Hversdagslegir hlutir geta verið stórhættulegir er lærdómurinn sem draga má af atviki sem varð í barnaskóla í Flórída á dögunum en þar var átta ára drengur hætt kominn vegna blýants.
Forsaga málsins er sú að Mandi Kapopoulous, kennari við skólann, tók eftir rauðum dropum á gólfi skólans. Í fyrstu taldi hún að um ávaxtasafa væri að ræða, eða allt þar til hún gekk upp að ungum dreng, Kolston Moradi, skammt frá og sá stóran blóðpoll hjá honum.
„Það var pollur af blóði undir honum og peysan hans var þakin blóði,“ segir hún í samtali við South Florida Sun Sentinel. Í ljós kom að vel yddaður blýantur í bakpoka drengsins hafði stungist í handarkrika hans með þeim afleiðingum að rof kom á slagæð.
Kolston missti mjög mikið blóð og mátti ekki miklu muna að honum hreinlega blæddi út. Sem betur fer tókst að koma Kolston undir læknishendur í tæka tíð.
Í samtali við blaðið segir drengurinn að hann hafi í raun ekki fundið fyrir neinum sársauka og í raun ekki áttað sig á því hvaðan blóðið kom. Kennararnir héldu þrýstingi að sárinu og kom sér vel að hjúkrunarfræðingur var við störf í skólanum og kunni hún réttu handtökin.
Kolston varð ekki meint af og mætti í skólann daginn eftir. Aðrir nemendur voru minntir á það að geyma blýantana í þar til gerðum pennaveskjum ofan í skólatöskunni.