Erla Hlynsdóttir hefur verið ráðin tímabundið fréttastjóri DV. „Það er stórkostlegur liðsfengur í Erlu og mun hún án efa styrkja enn frekar okkar góða teymi. Erla er harðdugleg og heiðarleg og hefur alla þá kosti er sæma góðum fréttastjóra,“ segir Þorbjörg Marinósdóttir sem fyrir skemmstu var ráðin ritstjóri DV og DV.is.

Erla hefur langan og fjölbreyttan feril að baki sem blaðamaður, meðal annars á DV, Stöð 2 og Fréttatímanum. Hún hefur þrisvar kært íslenska ríkið til Mannréttindadómstóls Evrópu vegna dóma sem féllu yfir henni í Hæstarétti í tengslum við störf hennar. Dómur hefur fallið Erlu í vil í öllum málunum. Erla hefur gegnt ýmsum öðrum störfum og var meðal annars um skeið framkvæmdastjóri Pírata.

DV gengst nú undir breytingar eftir að fjölmiðillinn varð hluti af fjölmiðlasamsteypunni Torg. Er unnið að því að laga ritstjórnarstefnu miðilsins að ritstjórnarstefnu Torgs. Ráðning Erlu er liður í því en ekki síður standa vonir til að innkoma hennar verði til að efla enn frekar stöðu dv.is sem er einn fjölsóttasti vefur landsins.