Zlatan Ibrahimovic, einn besti knattspyrnumaður í heimi síðustu ár æfir þessa dagana með Hammarby í Svíþjóð. Zlatan er samningsbundinn AC Milan en ástandið vegna kórónuveirunnar er slæmt þar í landi, hann fór því heim til Svíþjóðar.
Framherjinn keypti hlut í Hammarby á síðasta ári og fær að halda sér í formi með liðinu. Allt var vitlaust í Svíþjóð þegar Zlatan keypti í Hammarby enda goðsögn hjá Malmö, sem eru erkifjendur Hammarby.
Með Hammarby leikur Aron Jóhannsson en hann og Zlatan sáust á spjalli fyrir æfingu Hammarby í dag.
,,Aron og Zlatan að fara yfir málin á Skírdag. Mögulega smá Call of Duty umræða í gangi,“ skrifar Ágúst Þór Ágútsson og birtir mynd af Aroni og Zlatan að spjalla. Báðir eru duglegir að gripa í þennan vinsæla tölvuleik.
Aron varð umdeildur á Íslandi þegar hann valdi að spila fyrir Bandaríkin en ekki Ísland, þetta var árið 2013 og áttu margir Íslendingar erfitt með að fyrirgefa Aroni þessa ákvörðun.
Aron er að hefja sitt fyrsta heila tímabil með Hammarby og hefur verið í stuði á undirbúningstímabilinu.
