Vegna endurgreiðslukrafna viðskiptavina ferðaþjónustufyrirtækja, sem hafa greitt fyrir þjónustu en ekki notað hana, eru greiðslumiðlunarfyrirtækina að endurmeta áhættu sína. Eitt greiðslumiðlunarfyrirtæki hefur sent viðskiptavinum sínum beiðni um ítarlegar upplýsingar um þetta. Á meðan hefur fyrirtækið frestað greiðslum til fyrirtækjanna.

Morgunblaðið skýrir frá þessu. Fyrirtækin áttu að fá þessar greiðslur 31. mars og ætluðu þær til launagreiðslna.

„Það er nógu mikill slagur að standa í þessu á erfiðum tímum þó að ekki bætist þetta á. Þetta eru peningar sem ég á, það getur ekki farið á milli mála, og ég lít á þetta sem fjárdrátt.“

Hefur blaðið eftir hótelstjóra á Suðurlandi sem fékk ekki greiðslu frá Kortaþjónustunni eins og hann átti von á.

Aðspurður um ástæður þess að fyrirtækið haldi þessum greiðslum eftir sagði Jakob Már Ásmundsson, forstjóri Kortaþjónustunnar, að Visa og Mastercard eigi kröfu á endurgreiðslu þar til þjónusta er veitt.

Mikill vandi steðjar að ferðaskrifstofum vegna endurgreiðslumála og hafa forsvarsmenn þeirra fundað með ráðamönnum að undanförnu vegna þess. Meðal annars hefur verið rætt um að þær megi endurgreiða pakkaferðir innan 60 daga í stað 14 daga eins og nú er.

Hluti af vanda fyrirtækjanna er sagður vera að þau hafa sjálf greitt birgjum sínum, til dæmis Icelandair, en óvíst er með endurgreiðslur frá birgjunum.