Frumvarp Miðflokksins um að draga á stöng ríkisfánann (tjúgufánann) alla daga ársins við opinberar byggingar, mun kosta Hæstarétt 3-5 milljónir ári. Þetta kemur fram í umsögn Hæstaréttar um frumvarpið, en það er til umfjöllunar í stjórnskipunar- og eftirlitsnefnd þingsins. Morgunblaðið greinir frá.

 „Tjúgufáninn skal dreginn á stöng alla daga ársins á Alþingishúsinu, Stjórnarráðshúsinu og byggingu Hæstaréttar Íslands kl. 8 að morgni og vera við hún til kl. 21 að kvöldi. Fáni forseta Íslands skal dreginn á stöng við embættisbústað hans og við skrifstofu hans í Reykjavík á sama tíma og vera jafnlengi við hún,“

segir í frumvarpinu. Þar er einnig mælst til þess að fánarnir skuli „lýstir upp“ í skammdeginu sem gæti haft í för með sér aukinn kostnað, en Hæstiréttur bendir á að kostnaður bara við að draga fánann að húni gæti reynst 3-5 milljónir króna:

„Af þessu tilefni vill Hæstiréttur benda á að ekki er vakt í húsnæði réttarins eftir kl. 16 á virkum dögum eða um helgar og á öðrum frídögum. Þyrfti því að kaupa þessa þjónustu alla daga ársins um kvöld og einnig að morgunlagi á frídögum. Þótt nákvæm kostnaðargreining hafi ekki farið fram er ekki ólíklegt að árlegur kostnaður gæti verið á bilinu 3 – 5 milljónir króna.“

Alls 11 lögaðilar hafa sent inn umsagnarbeiðnir vegna frumvarpsins, þar á meðal forsætisráðuneytið, dómsmálaráðuneytið, skrifstofa forseta Íslands, lögreglan á höfuðborgarsvæðinu, Íslandsstofa, skátarnir, félag þjóðfræðinga og samtök ferðaþjónustunnar.