Þú ert líklega ekki merkilegur pappír ef þú ekur um á mjög dýrum bíl. Líkur eru á að þú sért tuðgjarn, þrjóskur og átt að líkindum ekki gott með að sýna hluttekningu.

Þetta er samkvæmt niðurstöðum tveggja nýlegra rannsókna sem CNN fjallar um.

Í annarri rannsókninni voru niðurstöðurnar á þá leið að eftir því sem bíllinn er dýrari, þeim mun minni eru líkurnar á að ökumaður hans, eigandinn í flestum tilvikum, stoppi til dæmis þegar vegfarendur freista þess að ganga yfir götu.

Fylgst var með nokkur hundruð vegfarendum við ónefnda götu og voru niðurstöðurnar ótvíræðar. Þeir sem óku um á dýrum bílum voru síður líklegir til að stöðva fyrir vegfarendum en þeir sem óku um á meðaldýrum eða ódýrum bílum. Minnkuðu líkurnar að jafnaði um 3% fyrir hverja þúsund dollara sem bíllinn kostar. Þá voru ökumenn örlítið líklegri til að stoppa fyrir konum en körlum.

Varpa höfundar rannsóknarinnar þeirri tilgátu fram að ökumenn dýrra bíla eigi erfiðara en aðrir með að sýna hluttekningu og líti jafnvel á sig sem æðri að einhverju leyti.

Í niðurstöðum hinnar rannsóknarinnar, sem var gerð í Finnlandi, voru eigendur tæplega 1.900 bifreiða spurðir spjörunum úr. Spurningarnar voru um allt milli himins og jarðar; persónuleika þeirra, fjárhagsstöðu og að sjálfsögðu hvernig bíl þeir áttu. Niðurstöðurnar voru á þá leið að „sjálfhverfir karlar“ voru líklegastir til að eiga dýran bíl. Næstlíklegastir voru „samviskusamir einstaklingar af báðum kynjum“ eins og það er orðað. Þetta eru einstaklingar sem almennt telja sig samviskusama, metnaðarfulla og áreiðanlega.

Höfundur rannsóknarinnar varpar fram þeirri tilgátu, varðandi seinni hópinn, að þessi hópur líti á bílinn sem einskonar spegilmynd. Þeir vilji aka um á „áreiðanlegum bíl“ því þeir vilji sjálfir vera „áreiðanlegir“ í augum annarra.