Bloomberg skýrir frá þessu og segir að mörg fyrirtæki séu nú þegar farin að glíma við lausafjárskort og ef þau fái ekki hjálp frá bönkum þá geti þau endað með að fara í gjaldþrot. Haft er eftir talskonu einnar stærstu bílasölu landsins að ef fyrirtækið geti ekki borgað af lánum sínum endi þetta illa. Fyrirtækið rekur 100 útsölustaði og hafa þeir verið lokaðir í um einn mánuð vegna veirunnar. Lausafé er nú á þrotum og bankar eru tregir til að lengja í lánum fyrirtækisins.
Sama sviðsmynd er uppi í öðrum hlutum kínverska hagkerfisins. Könnun meðal lítilla og meðalstórra fyrirtækja leiddi í ljós að þriðjungur þeirra á nægt lausafé til að þrauka í mánuð til viðbótar en þriðjungur getur þraukað í tvo mánuði. 18 prósent segjast geta þraukað í þrjá mánuði.
Kínverski seðlabankinn hefur lækkað vexti og skipað bönkum landsins að auka útlán og vera sveigjanlegir hvað varðar greiðslur lána en mörg fyrirtæki segja að samt sem áður sé erfitt að verða sér úti um næga fjármögnun.
Einkafyrirtæki standa undir um 60 prósentum af efnahag landsins og sjá 80 prósentum vinnandi fólks fyrir vinnu. Þau skipta því miklu máli fyrir kínverskt efnahagslíf.
