Jóhann Ingi Hafþórsson, blaðamaður á Morgunblaðinu segir skemmtilega sögu í blaði dagsins. Hann rifjar upp sögu úr grunnskóla þegar hann var í fótbolta í frítíma þar. Hann segir söguna og rifjar upp leik við Kolbein Sigþórsson, framherja AiK á sama tíma.
,,Knattspyrnumaðurinn Kolbeinn Sigþórsson er fæddur árið 1990, einu ári á undan mér. Við ólumst upp í sama hverfi og sá ég hann reglulega á æfingum og í leikjum með Víkingi Reykjavík. Þá vorum við um tíma saman í Réttó,“ skrifar Jóhann Ingi í blað dagsins.
,,Það var vitað þegar Kolbeinn var kornungur að hann myndi ná langt. Það var líka vitað þegar ég var ungur að ég myndi ekki ná langt, en það er ekki aðalatriðið í þessari sögu.“
Þegar Jóhann spilaði við Kolbein þá fékk hann skot í djásnið. ,,Boltinn fór í mig miðjan, á eins vondan stað og hann gat farið. Ég man hvernig ég hneig niður í grasið og gat varla andað. Svo sá ég að einn félagi hans tók frákastið og skoraði á meðan ég lá í grasinu.“
Hann segir svo að sú staðreynd að hann eigi ekki barn í dag, sé þessu skoti að kenna. ,,Það eina sem er verra en að fá bombu frá Kolbeini Sigþórssyni í punginn er að fá bombu frá Kolbeini Sigþórssyni í punginn og sjá liðsfélaga hans skora framhjá þér strax í kjölfarið. Ég á engin börn í dag og ég kenni honum um.“
Kolbeinn er markahæsti leikmaður í sögu íslenska landsliðsins ásamt Eiði Smára Guðjohnsen.
