Staðgreiðsla útsvars nam á síðasta ári 205 milljörðum króna samanborið við 194 milljarða 2018 og hækkun milli ára því um 5,6 %. Þetta kemur fram á vef Sambands íslenskra sveitarfélaga.
Um er að ræða bráðabirgðauppgjör en endanlegt uppgjör mun liggja fyrir í maílok þegar álagningarskránni verður lokað.
Mest var hækkun útsvars í staðgreiðslu milli 2018 og 2019 á Suðurlandi eða um 7,4 %. Þar á eftir kemur Norðurland vestra með um 7,3% hækkun.
Staðgreiðslan hækkaði hlutfallslega minnst á Austurlandi eða um 5,0%. Hjá öðrum landshlutum var hækkunin á bilinu 5,1 % upp í rúmlega 6,7 %.
Hér má sjá skjal með nánari upplýsingum um staðgreiðslu einstakra sveitarfélaga.
