Það bendir allt til þess að Alfons Sampsted, bakvörður Norköping í Svíþjóð yfirgefi félagið á næstu dögum eða vikum. Þannig herma öruggar heimildir 433.is að hann sé nú í viðræðum við Álasund í Noregi.

Alfons hefur fengið fá tækifæri hjá sænska félaginu eftir að hann gekk í raðir félagsins árið 2017, frá Breiðabliki.

Alfons hefur í þrígang verið lánaður í Svíþjóð og kom heim á láni til Breiðabliks, síðasta sumar. Breiðablik hefur reynt að sannfæra Alfons um að snúa heim en hann vill halda áfram erlendis.

Álasund er komið aftur upp í norsku úrvalsdeildina en hjá félaginu eru fyrir þrír Íslendingar, það eru Hólmbert Aron Friðjónsson, Daníel Leó Grétarsson og Davíð Kristján Ólafsson sem var samherji Alfons í Breiðablik.

Álasund missti Aron Elís Þrándarson í vetur og ljóst að félagið vill ekki fækka Íslendingum áður en tímabilið í norsku úrvalsdeildinni hefst.

Alfons er öflugur hægri bakvörður en hann er aðeins 21 árs gamall.