Lögregluyfirvöld í Atlanta í Georgíuríki í Bandaríkjunum telja sig hafa leyst 34 ára gamla morðgátu. Árið 1983 var ungur blökkumaður, Timothy Coggins að nafni, myrtur á hrottafenginn hátt. Lík Coggins, sem var 23 ára, fannst í skóglendi skammt suður af Atlanta nokkrum dögum síðar.
Í umfjöllun NBC News kemur fram að lögregla hafi haft grunsemdir um hver hefði framið morðið á sínum tíma, en þær leiddu þó ekki til þess að ákæra væri gefin út. Að sögn Darrell Dix, lögreglustjóra í Spalding-sýslu, voru möguleg vitni rög við að gefa sig fram við lögreglu af ótta við hefndaraðgerðir.
Það var svo í mars síðastliðnum sem lögreglu bárust nýjar vísbendingar í málinu. Ekki kemur fram í umfjöllun bandarískra fjölmiðla hvers eðlis þær voru, en Dix segir að vitni, sem ekki vildu tjá sig á sínum tíma, hafi verið yfirheyrð að nýju. Þær yfirheyrslur leiddu svo til þess að fimmenningarnir voru handteknir.
Meðal hinna handteknu eru tveir lögreglumenn sem taldir eru hafa tekið þátt í að hylma yfir með þeim sem frömdu morðið, Bill Moore, 58 ára, og Frankie Gebhardt, 59 ára. Að sögn Darrell Dix telur lögregla að um hatursglæp hafi verið að ræða á sínum tíma. Coggins hafi verið myrtur af þeirri ástæðu að hann var blökkumaður.