Breska greiningarfyrirtækið OAG tók nýlega saman lista yfir stundvísustu flugfélög heims og flugvelli. Miðað við listann þá er ljóst að best er að horfa til austurs þegar skoðað er hvaða félög og flugvellir standa sig best hvað varðar stundvísi. Evrópskir flugvellir og flugfélög standa sig almennt ekki eins vel í að koma vélunum á loft á réttum tíma og er gert víða annarsstaðar í heiminum.

Skýrslu OAG er skipt upp í nokkra kafla þar sem frammistaða flugfélaga og flugvalla er mæld eftir stærð þeirra og staðsetningu í heiminum. Samkvæmt skýrslunni er Garuda Indonesia það flugfélag sem stendur sig best í að koma vélum sínum í loftið á réttum tíma. Af stóru flugfélögunum er það rússneska flugfélagið Aeroflot sem stendur sig best en 86,7% flugum félagsins lenda á áfangastað með minna en fimmtán mínútna seinkun.

Ef horft er á heiminn sem eina heild þá eru það auk Aeroflot flugfélög á borð við Latam Airlines Group (frá Chile), Delta Airlines, Nippon Airlines og hið Skandinavíska SAS sem standa sig einna best í að halda áætlun.

Hvað varðar flugvelli heimsins þá er Sheremetyevo flugvöllurinn í fyrsta sæti yfir þá flugvelli sem fleiri en 30 milljónir farþega fara um árlega. Á eftir fylgja Haneda í Tókýó, Changi í Singapore, Atlanta  og Seattle í Bandaríkjunum.

Af aðeins minni flugvöllum, þeim sem 20 til 30 milljónir farþega fara um árlega, stendur Sabiha Gökcek í Istanbúl sig best. Þar á eftir koma Minneapolis, Detroit og Sao Paolo.