Gamalkunnug en úrelt fyrirbæri á borð við útvarpsstöðina Aðalstöðina, Radíóbúðina, drykkinn Spur Cola, Rakarastofuna Klapparstíg, Sinclair tölvur, Rafha eldavélar og margt fleira gamalt og misgott, öðlast nýtt líf í sérstæðri vefverslun þar sem saman fara nostalgía og stríðni. Í slíkri verslun eru Icesave bolir og bollar nauðsynlegir gripir en enn meiri broddur er í bolum sem merktir eru lögfræðiskrifstofunni Mossack Fonseca sem þjónustað hefur aflandsfyrirtæki.

Verslunin ber heitið Glatkistan. Þarna getur „bolurinn“ fengið sína eigin fálkaorðu því seldir eru bolir með mynd af fálkaorðunni. Sjón er sögu ríkari og það er alveg augnabliksins virði að gægjast í glatkistuna.