Sara Björk Gunnarsdóttir, fyrirliði Íslands í fótbolta er í ítarlegu viðtali við Dr. Football Þar segir hún frá ljótum sögum sem hún mátti sitja undir þegar stjarna hennar sem knattspyrnukona var að rísa.

Sara var sögð eiga í ástarsambandi við Sigurð Ragnar Eyjólfsson, þá landsliðsþjálfara. Ekkert var til í þeim sögum og Sara átti erfitt með að tækla málið. Sara var ungur leikmaður en var að slá í gegn með landsliðinu, fólk í kringum landsliðið var að dreyfa þessum sögum.

,,Að ég væri að sofa hjá landsliðsþjálfaranum, að það væri ástæða þess að ég væri að spila. Byrja alla leiki, ég gerði mér ekki grein fyrir þessu strax. Ég fékk svínaflensuna, ég var í Frakklandi. Þá var skrifaður þessi frægi status um að SR (Sigurður Ragnar) væri hugsanlega með svínaflensu, hann væri líka með hana. Ég pældi ekkert í þessu,“ sagði Sara Björk við Dr. Football.

,,Ég heyrði í vinkonu minni eftir að ég kom heim, að þessi orðrómur væri að ganga. Maður var ungur og búinn að leggja mikið á sig, svo heyrir maður svona. Þetta er fólk sem maður er í kringum, að æfa með. Maður treysti, þetta var högg í andlitið.“

,,Hvað átti ég að gera? Átti ég að halda fund, eina sem ég hugsaði var að sanna hversu góð ég væri.“