Atli Viðar Björnsson, fyrrum framherji FH hafnar því í samtali við Fótbolta.net að hann hafi ætlað í mál við FH, sökum launa sem félagið skuldar sér. Þetta gerir hann í samtali við Fótbolta.net.

FH hefur skuldað leikmönnum sínum talsverðar fjárhæðir síðustu mánuði og mikið verið fjallað um málið. Fjallað var um málið í Dr. Football í dag en þar er fullyrt að Atli Viðar Björnsson, fyrrum leikmaður félagsins eigi inni einhverjar milljónir hjá félaginu. Atli Viðar hætti í FH fyrir meira en ári síðan. ,,Ég hef fengið 93 ábendingar um að Atli Viðar eigi inni pening hjá FH,“ sagði Hjörvar Hafliðason, stjórnandi þáttarins.

Kristján Óli Sigurðsson, sérfræðingur þáttarins segir að Atli Viðar hafi ætlað í málaferli við FH. ,,Skýrslan er þannig, hann var á leiðinni í málaferli við félagið. Þetta hleypur á einhverjum milljónum, það náði að stoppa þessi málaferli í bili. Ég væri búinn að heyra ef greiðslur væru komnar.“

Atli hafnar þessu öllu í samtali við Fótbolta.net. „Fyrir það fyrsta koma mín launamál öðrum ekki við. Það á samt sama við mig og marga aðra í íþróttahreyfingunni að ég fekk ekki launin alltaf fyrsta hvers mánaðar,“ hélt hann áfram.

„En það hefur ekki hvarflað að mér í eina sekúndu að fara í mál við FH og það er enginn fótur fyrir því. Ég hef bara átt í góðum samskiptum við þá sem stjórna FH síðan ég hætti,“ sagði Atli við Fótbolta.net.