Hinn heimsþekkti sjónvarpsmaður og umhverfisverndarsinni Sir David Attenborough segir að „of seint“ sé að stöðva loftslagsbreytingarnar, þróuninni verði ekki snúið við úr þessu. Hann varar einnig við miklum óróleika og mótmælum almennings ef ekkert verður að gert til að bregðast við vandanum.

Þetta sagði hann í samtali við Channel 4 News. Hann sagði jafnframt að „það besta sem við getum vonast eftir er að hægja á breytingunum og það mikið“.

Þegar þáttastjórnandinn bar upp spurningu frá 11 ára barni sem hafði sent þættinum bréf og spurt hvað væri það versta sem gæti gerst í lífi þess ef „ekki verður tekist á við loftslagsbreytingarnar“ svaraði Attenborough:

„Ég held að það verði umfangsmikil almenn mótmæli og óróleiki og miklir fólksflutningar. Ég held að við munum finna nægilega fæðu en það gæti þó orðið eitthvað annað en nákvæmlega það sem við myndum helst kjósa.“

Hann sagði jafnframt að erfitt væri að sjá stjórnmálamenn væru að gera eitthvað af alvöru í málunum. Hann gagnrýndi Boris Johnson, forsætisráðherra, fyrir að taka ekki þátt í kappræðum stjórnmálaleiðtoga um loftslagsmál í síðustu viku.