Ísland mun í mars spila leiki um laust sæti á Evrópumótið sem fram fer næsta sumar, þetta varð ljóst í gær eftir jafntefli við Tyrkland. Það mun koma í ljós í næstu viku hverjir andstæðingar Íslands verða.

Leikið er í undanúrslitum og úrslitum, um laust sæti á EM, leikirnir fara fram 26 mars og 31 mars. Ísland mun alltaf eiga heimaleik í undanúrslitum, það verður svo dregið um hvar úrslitaleikurinn fer fram.

Eins og flestir vita er veðurfarið hér á landi þannig að ekki er öruggt að hægt verði að spila á grasi, í lok mars. Það kemur til greina að leikurinn fari fram í Kaupamannahöfn. Forráðamenn danska sambandsins hafa rætt við forráðamenn KSÍ og nefnt að heimavöllur Bröndby sé góður kostur.

,,Danska sambandið hefur bent á að sá völlur gæti hentað, en ég veit ekki til þess að það hafi verið formlegar samræður um slíkt. Í samtali mínum við framkvæmdarstjóra danska sambandsins, kom það til tals að völlur Bröndby væri góður kostur,“ sagði Klara Bjartmarz, framkvæmdarstjóri KSÍ við 433.is í dag.

Brøndby Stadion, er í Kaupmannahöfn en hann tekur 28 þúsund manns í sæti. Það mun koma í ljós eftir áramót hvort Laugardalsvöllur verður leikfær. ,,Fyrsta val okkar er alltaf að spila á Íslandi.“

Í Færeyjum er upphitaður gervigrasvöllur. ,,Færeyingar hafa hringt í okkur, þeir sögðu okkur að þeir ættu upphitaðan völl sem við mættum nota. Þeir hlógu talsvert þegar við ræddum þessi mál,“ sagði Klara.

Ljóst er að fjöldi Íslendinga myndi leggja leið sína frá Íslandi til Kaupmannahafnar, verði leikurinn þar.