Einar Þór Sigurðsson skrifar frá Istanbúl: 

Roberto Carlos, fyrrverandi leikmaður Real Madrid og brasilíska landsliðsins, býst við hörkuleik þegar Tyrkir taka á móti Íslendingum í Istanbúl nú síðdegis.

Roberto Carlos þarf ekki að kynna fyrir knattspyrnuáhugamönnum, en þessi skotfasti vinstri bakvörður varð heimsmeistari með Brasilíu og lék í fjölmörg ár með Real Madrid þar sem hann vann meðal annars Meistaradeildina.

Eftir að Carlos yfirgaf Real Madrid gekk hann í raðir Fenerbache og hefur hann fylgst vel með tyrkneskum fótbolta síðan þá. Auk þess að spila með liðinu þjálfaði hann síðar Sivasspor og Akhisar Beledyespor í tyrknesku deildinni.

Í myndbandi sem vefmiðilinn Fotomac í Tyrklandi birti á vef sínum spáir Carlos í spilin og býst hann við að Tyrkir tryggi sér sæti í lokakeppni Evrópumótsins.

„Leikur Tyrklands og Íslands verður mjög áhugaverður. Ég fylgist vel með tyrkneskum fótbolta og gæðin í landsliðinu eru mikil um þessar mundir og þjálfarinn og þjálfarateymið býr yfir mikilli reynslu. Ég held að Tyrkir muni bera sigur úr býtum í góðum leik. Tyrkir eru með bestu stuðningsmennina enda elska þeir fótbolta.“