Þann 22. október síðastliðinn gleymdi Stephen Morris, fiðluleikari, fiðlu sinni um borð í járnbrautarlest þegar hann yfirgaf hana á Penge East í Lundúnum. Fiðlan er 310 ára og er metin á sem svarar til um 40 milljóna íslenskra króna.

Morris hafði komið fram í fjölmiðlum og skorað á þann sem tók fiðluna að skila henni aftur. Hann sagði hræðilegt að hafa glatað hljóðfærinu sem hann hafi leikið á síðustu 20 árin.

Lögreglan rannsakaði málið og birti myndir af manni sem tók fiðluna þegar lestin nálgaðist Bromley South stöðina og fór með hana frá borði og um borð í lest til St Mary Cray.

Morris fékk fiðluna aftur eftir að leynilegar samningaviðræður höfðu farið fram við manninn sem tók hana en hreyfing komst á málið eftir að lögreglan birti myndirnar. Morris hitti manninn síðan við verslun í Beckingham að kvöldlagi. Óeinkennisklæddir lögreglumenn fylgdust með en gripu ekki inn í. Maðurinn lét Morris fá fiðluna og bogann. Ekki verða eftirmálar af þessu öllu saman.

Sky segir að fiðlan hafi verið smíðuð 1709 af David Tecchler.